(ਪੰਜਾਬ) ਫਿਰੋਜਪੁਰ 17 ਨਵੰਬਰ {ਕੈਲਾਸ਼ ਸ਼ਰਮਾ ਜਿਲਾ ਵਿਸ਼ੇਸ਼ ਸੰਵਾਦਦਾਤਾ}=
ਰਾਏਪੁਰ, ਜੰਮੂ–ਕਸ਼ਮੀਰ ਵਿੱਚ ਆਉਂਦੇ ਦਿਨਾਂ ਵਿੱਚ ਸ਼੍ਰੀ ਰਾਮ ਜਗ ਦਾ ਵਿਸ਼ਾਲ ਅਤੇ ਆਧਿਆਤਮਿਕ ਸਮਾਰੋਹ 5 ਦਸੰਬਰ 2025 ਤੋਂ 13 ਦਸੰਬਰ 2025 ਤੱਕ ਆਯੋਜਿਤ ਕੀਤਾ ਜਾ ਰਿਹਾ ਹੈ। ਇਸ ਮਹਾਨ ਧਾਰਮਿਕ ਪ੍ਰੋਗਰਾਮ ਦੀ ਅਗਵਾਈ ਮਹਾਂ ਮੰਡਲੇਸ਼ਵਰ ਮਹੰਤ ਸ਼੍ਰੀ ਰਾਜੇਸ਼ ਗਿਰੀ (ਬਿੱਟੂ) ਜੀ, ਜੋ ਕਿ ਸੰਤ ਸਮਾਜ ਟਰਸਟ ਜੰਮੂ–ਕਸ਼ਮੀਰ ਦੇ ਸੰਗਠਨ ਮੰਤਰੀ ਵੀ ਹਨ, ਦੁਆਰਾ ਕੀਤੀ ਜਾ ਰਹੀ ਹੈ। ਇਹ ਸਮਾਰੋਹ ਸਿਰਫ ਧਾਰਮਿਕ ਪ੍ਰੇਰਣਾ ਦਾ ਕੇਂਦਰ ਨਹੀਂ, ਬਲਕਿ ਸਮਾਜਕ ਏਕਤਾ, ਭਗਤੀ ਅਤੇ ਸੰਸਕਾਰੀ ਮੁੱਲਾਂ ਨੂੰ ਮਜ਼ਬੂਤ ਬਣਾਉਣ ਦਾ ਵੀ ਪ੍ਰਤੀਕ ਹੋਵੇਗਾ।
ਸਮਾਰੋਹ ਦੀਆਂ ਤਿਆਰੀਆਂ ਅਤੇ ਪ੍ਰਬੰਧਾਂ ਬਾਰੇ ਵਿਸਥਾਰ ਪੂਰਵਕ ਚਰਚਾ ਕਰਨ ਲਈ ਐਸਬੀਐਸ ਅਤੇ ਹਾਰਮਨੀ ਦੇ ਚੇਅਰਮੈਨ ਧਰਮਪਾਲ ਬੰਸਲ ਜੀ ਅਤੇ ਕੈਲਾਸ਼ ਸ਼ਰਮਾ ਮਠ ਮੰਦਰ ਪ੍ਰਮੁੱਖ ਜ਼ਿਲ੍ਹਾ ਫਿਰੋਜਪੁਰ ਨੇ ਮਹੰਤ ਰਾਜੇਸ਼ ਗਿਰੀ ਜੀ ਨਾਲ ਵਿਸ਼ੇਸ਼ ਮੁਲਾਕਾਤ ਕੀਤੀ। ਇਸ ਦੌਰਾਨ ਪ੍ਰੋਗਰਾਮ ਦੀ ਪੂਰੀ ਰੂਪ-ਰੇਖਾ, ਭਗਤਾਂ ਦੀ ਸੁਵਿਧਾ, ਸੰਗਤ ਲਈ ਪ੍ਰਬੰਧ, ਭਜਨ-ਕੀਰਤਨ, ਪ੍ਰਵਚਨ ਅਤੇ ਸੇਵਾ ਕਾਰਜਾਂ ਬਾਰੇ ਗਹਿਰਾਈ ਨਾਲ ਵਿਚਾਰ–ਵਟਾਂਦਰਾ ਕੀਤਾ ਗਿਆ। ਧਰਮਪਾਲ ਬੰਸਲ ਜੀ ਨੇ ਹਾਰਮਨੀ ਗਰੁੱਪ ਵੱਲੋਂ ਕੀਤੇ ਜਾ ਰਹੇ ਸਮਾਜਿਕ ਅਤੇ ਧਾਰਮਿਕ ਯੋਗਦਾਨ ਦੀ ਜਾਣਕਾਰੀ ਦਿੱਤੀ ਅਤੇ ਰਾਮ ਯਗ ਨੂੰ ਹੋਰ ਵੱਡੇ ਪੱਧਰ 'ਤੇ ਸਫਲ ਬਣਾਉਣ ਲਈ ਆਪਣਾ ਸਹਿਯੋਗ ਦੇਣ ਦੀ ਵਚਨ ਬਧਤਾ ਦੁਹਰਾਈ।
ਦੌਰੇ ਦੌਰਾਨ ਧਰਮਪਾਲ ਬੰਸਲ ਅਤੇ ਕੈਲਾਸ਼ ਸ਼ਰਮਾ ਮਹੰਤ ਜੀ ਨਾਲ ਕਈ ਪਿੰਡਾਂ ਵਿੱਚ ਵੀ ਗਏ ਜਿੱਥੇ ਉਨ੍ਹਾਂ ਨੇ ਸਥਾਨਕ ਲੋਕਾਂ ਨਾਲ ਮਿਲ ਕੇ ਸ਼੍ਰੀ ਰਾਮ ਯਗ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਨੇ ਲੋਕਾਂ ਨੂੰ ਦੱਸਿਆ ਕਿ ਇਹ ਸਮਾਰੋਹ ਸਮਾਜ ਨੂੰ ਭਗਵਾਨ ਰਾਮ ਦੇ ਆਦਰਸ਼ਾਂ,ਸੱਚਾਈ, ਮਰਿਆਦਾ, ਕਰੁਣਾ ਅਤੇ ਨੈਤਿਕਤਾ ਨਾਲ ਜੋੜਨ ਦਾ ਸੁਨਹਿਰਾ ਮੌਕਾ ਹੈ। ਪਿੰਡ ਵਾਸੀਆਂ ਨੇ ਧਰਮਪਾਲ ਬੰਸਲ ਜੀ ਦਾ ਗਰਮਜੋਸ਼ੀ ਨਾਲ ਸਵਾਗਤ ਕੀਤਾ ਅਤੇ ਇਸ ਵਿਸ਼ਾਲ ਸਮਾਰੋਹ ਵਿੱਚ ਪੂਰੀ ਭਾਗੀਦਾਰੀ ਦਾ ਭਰੋਸਾ ਦਿੱਤਾ। ਬਹੁਤ ਸਾਰੇ ਨੌਜਵਾਨ ਅਤੇ ਮਹਿਲਾਵਾਂ ਨੇ ਵੀ ਰਾਮ ਯਗ ਵਿੱਚ ਸੇਵਾ ਕਰਨ ਦੇ ਲਈ ਆਪਣੀ ਰਜਾਮੰਦੀ ਜ਼ਾਹਰ ਕੀਤੀ।ਇਸ ਦੌਰਾਨ ਧਰਮਪਾਲ ਬੰਸਲ ਜੀ ਦੀ ਜੰਮੂ–ਕਸ਼ਮੀਰ ਦੇ ਕੈਬਿਨੇਟ ਮੰਤਰੀ ਸੁਰਜੀਤ ਸਿੰਘ ਸਲਾਥੀਆ ਨਾਲ ਵੀ ਮਹੱਤਵਪੂਰਨ ਮੁਲਾਕਾਤ ਹੋਈ। ਇਸ ਵਿਚ ਪ੍ਰੋਗਰਾਮ ਲਈ ਲਾਜ਼ਮੀ ਸਹਿਯੋਗ, ਸੁਰੱਖਿਆ ਪ੍ਰਬੰਧ, ਟ੍ਰੈਫਿਕ ਅਤੇ ਆਵਾਜਾਈ ਬਾਰੇ ਵੀ ਚਰਚਾ ਕੀਤੀ ਗਈ। ਮੰਤਰੀ ਜੀ ਨੇ ਪੂਰਾ ਸਹਿਯੋਗ ਦੇਣ ਦਾ ਭਰੋਸਾ ਦਿੰਦਿਆਂ ਕਿਹਾ ਕਿ ਇਸ ਤਰ੍ਹਾਂ ਦੇ ਸਮਾਰੋਹ ਸਮਾਜ ਨੂੰ ਜੋੜਦੇ ਹਨ ਅਤੇ ਧਾਰਮਿਕ ਵਿਰਾਸਤ ਨੂੰ ਮਜ਼ਬੂਤ ਬਣਾਉਂਦੇ ਹਨ।
ਇਸ ਤੋਂ ਬਾਅਦ ਸ਼੍ਰੀ ਹਨੁਮਾਨ ਮੰਦਰ ਵਿੱਚ ਸੁੰਦਰ ਭਜਨ ਸੰਧਿਆ ਦਾ ਆਯੋਜਨ ਕੀਤਾ ਗਿਆ। ਜਿਸ ਵਿੱਚ ਧਰਮਪਾਲ ਬੰਸਲ ਜੀ ਵੱਲੋਂ ਭਜਨ ਗਾਇਨ ਕੀਤਾ ਗਿਆ। ਭਗਤਾਂ ਨੇ ਭਗਤੀਮਈ ਵਾਤਾਵਰਨ ਵਿੱਚ ਭਜਨਾਂ ਦਾ ਆਨੰਦ ਮਾਣਿਆ ਅਤੇ ਮਹੰਤ ਰਾਜੇਸ਼ ਗਿਰੀ ਜੀ ਨੂੰ ਵਿਸ਼ੇਸ਼ ਤੌਰ 'ਤੇ ਸਨਮਾਨਿਤ ਕੀਤਾ ਗਿਆ। ਇਸ ਸਮਾਗਮ ਵਿੱਚ ਮਹੰਤ ਸ਼ੁਰੂਤਕੀਰਤੀ ਗਿਰੀ ਜੀ, ਸ੍ਰੀ ਰਾਮ ਨਰਾਇਣ ਦਾਸ ਸ਼ਾਸਤਰੀ ਜੀ, ਸ੍ਰੀ ਮਹੰਤ ਸ੍ਰੀ ਸ਼ਾਂਤੀ ਗਿਰੀ ਜੀ, ਸ਼੍ਰੀ ਵਿਜੇ ਕ੍ਰਿਸ਼ਨ ਪਰਾਸ਼ਰ ਜੀ, ਸ੍ਰੀ ਸੰਜੇ ਦਾਸ ਜੀ, ਪੰਡਿਤ ਕਾਲੀ ਦਾਸ ਜੀ,ਅਤੇ ਹੋਰ ਸੰਤ ਸਮਾਜ ਦੇ ਮਹੰਤ ਵੀ ਮੌਜੂਦ ਰਹੇ।
ਸਮੂਹ ਦੌਰਾ ਆਧਿਆਤਮਿਕ ਰੰਗਾਂ ਨਾਲ ਭਰਪੂਰ ਰਿਹਾ ਅਤੇ ਸ਼੍ਰੀ ਰਾਮ ਯਗ ਦੀਆਂ ਤਿਆਰੀਆਂ ਨੂੰ ਇਕ ਨਵੀਂ ਦਿਸ਼ਾ ਅਤੇ ਸ਼ਕਤੀ ਮਿਲੀ। ਰਾਏਪੁਰ ਵਿੱਚ ਹੋਣ ਜਾ ਰਿਹਾ ਇਹ ਸਮਾਰੋਹ ਨਿਸ਼ਚਿਤ ਤੌਰ 'ਤੇ ਭਗਤੀ, ਸਾਂਝ ਅਤੇ ਸੇਵਾ ਦਾ ਪ੍ਰਤੀਕ ਬਣੇਗਾ।
