(ਪੰਜਾਬ) ਫਿਰੋਜਪੁਰ 31 ਅਕਤੂਬਰ {ਕੈਲਾਸ਼ ਸ਼ਰਮਾ ਜਿਲਾ ਵਿਸ਼ੇਸ਼ ਸੰਵਾਦਦਾਤਾ}=
ਸ਼੍ਰੀ ਬਾਲ ਗੋਪਾਲ ਗੌਸ਼ਾਲਾ, ਫਿਰੋਜ਼ਪੁਰ ਵਿੱਚ ਗੋਪਾਲ ਅਸ਼ਟਮੀ ਦਾ ਸ਼ਾਨਦਾਰ ਤੇ ਭਗਤੀਮਈ ਸਮਾਗਮ ਭਾਰੀ ਧੂਮਧਾਮ ਨਾਲ ਮਨਾਇਆ ਗਿਆ। ਇਸ ਪਵਿੱਤਰ ਮੌਕੇ ‘ਤੇ ਭਗਤੀ ਭਜਨ ਗਰੁੱਪ ਦੇ ਸੰਸਥਾਪਕ ਸ਼੍ਰੀ ਧਰਮਪਾਲ ਬਾਸਲ ਜੀ ਨੇ ਗਉਮਾਤਾ ਦੇ ਭਜਨ ਗਾ ਕੇ ਸਾਰੇ ਮਾਹੌਲ ਨੂੰ ਭਗਤੀ ਭਾਵਨਾ ਨਾਲ ਭਰ ਦਿੱਤਾ। ਉਨ੍ਹਾਂ ਦੇ ਸੁਰੀਲੇ ਭਜਨਾਂ ਨੇ ਸਭ ਹਾਜ਼ਰ ਭਗਤਾ ਦੇ ਮਨ ਨੂੰ ਛੂਹ ਲਿਆ। ਧਰਮਪਾਲ ਬਾਸਲ ਜੀ ਨੇ ਆਪਣੇ ਸੰਬੋਧਨ ਵਿਚ ਕਿਹਾ ਕਿ ਗਉ ਮਾਤਾ ਸਾਡੀ ਭਾਰਤੀ ਸੰਸਕ੍ਰਿਤੀ ਦੀ ਆਤਮਾ ਹਨ, ਤੇ ਹਰ ਮਨੁੱਖ ਦਾ ਫਰਜ਼ ਬਣਦਾ ਹੈ ਕਿ ਉਹ ਗਉ ਸੇਵਾ ਨੂੰ ਆਪਣਾ ਧਰਮ ਬਣਾਏ। ਉਨ੍ਹਾਂ ਨੇ ਕਿਹਾ ਕਿ ਗਉ ਮਾਤਾ ਸਿਰਫ ਧਾਰਮਿਕ ਦ੍ਰਿਸ਼ਟੀ ਤੋਂ ਹੀ ਨਹੀਂ, ਸਾਇੰਸ ਅਨੁਸਾਰ ਵੀ ਬਹੁਤ ਮਹੱਤਵਪੂਰਨ ਹਨ। ਗਉ ਦੇ ਦੁੱਧ, ਗੋਬਰ ਅਤੇ ਗਉਮੂਤਰ ਵਿਚ ਅਨੇਕਾਂ ਔਸ਼ਧੀ ਗੁਣ ਹਨ ਜੋ ਸਿਹਤ ਤੇ ਵਾਤਾਵਰਣ ਦੋਵਾਂ ਲਈ ਲਾਭਕਾਰੀ ਹਨ। ਉਨ੍ਹਾਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਗਉਸ਼ਾਲਾ ਦੀ ਸੇਵਾ ਕਰਨ, ਗਉ ਮਾਤਾ ਲਈ ਚਾਰੇ ਤੇ ਪਾਣੀ ਦੀ ਵਿਵਸਥਾ ਵਿਚ ਹਿੱਸਾ ਪਾਉਣ ਅਤੇ ਆਪਣੇ ਬੱਚਿਆਂ ਨੂੰ ਵੀ ਗਉ ਸੇਵਾ ਦਾ ਸੰਸਕਾਰ ਦੇਣ। ਇਸ ਪਾਵਨ ਸਮਾਰੋਹ ਵਿਚ ਵਿਸ਼ੇਸ਼ ਮਹਿਮਾਨ ਏ.ਡੀ.ਸੀ ਅਮਿਤ ਸਰੀਨ (ਫਿਰੋਜ਼ਪੁਰ), ਅਤੇ ਸ਼੍ਰੀ ਅਨਿਰੁੱਧ ਗੁਪਤਾ ਜੀ (ਸੀ.ਈ.ਓ ਡੀ.ਸੀ.ਐਮ. ਗਰੁੱਪ ਆਫ ਸਕੂਲਜ਼ ) ਵਿਸ਼ੇਸ਼ ਤੌਰ ‘ਤੇ ਸ਼ਾਮਿਲ ਹੋਏ। ਉਨ੍ਹਾਂ ਨੇ ਵੀ ਗਉ ਪੂਜਾ ਦੀ ਮਹੱਤਤਾ ‘ਤੇ ਚਰਚਾ ਕੀਤੀ ਅਤੇ ਭਗਤੀ ਭਜਨ ਗਰੁੱਪ ਵੱਲੋਂ ਕੀਤੇ ਜਾ ਰਹੇ ਸਮਾਜਿਕ ਤੇ ਆਧਿਆਤਮਿਕ ਯਤਨਾਂ ਦੀ ਪ੍ਰਸ਼ੰਸਾ ਕੀਤੀ। ਇਸ ਸਮਾਗਮ ਵਿੱਚ ਨਗਰ ਕੌਂਸਲ ਪ੍ਰਧਾਨ ਸ਼੍ਰੀ ਰਿੰਕੂ ਗਰੋਵਰ ਜੀ ਵੀ ਹਾਜ਼ਰ ਰਹੇ। ਉਨ੍ਹਾਂ ਨੇ ਕਿਹਾ ਕਿ ਇਸ ਤਰ੍ਹਾਂ ਦੇ ਧਾਰਮਿਕ ਪ੍ਰੋਗਰਾਮ ਸਮਾਜ ਨੂੰ ਏਕਤਾ ਅਤੇ ਸੰਸਕ੍ਰਿਤੀ ਨਾਲ ਜੋੜਦੇ ਹਨ। ਸਮਾਗਮ ਦੌਰਾਨ ਪੂਰੀ ਗਉਸ਼ਾਲਾ ਭਗਤੀ ਮਈ ਮਾਹੌਲ ਨਾਲ ਗੂੰਜਦੀ ਰਹੀ। ਸਵਾਮੀ ਜੀ ਡਾ.ਅਨਿਲ ਸ਼ਰਮਾ, ਸਵਾਮੀ ਵਿੱਦਿਆ ਨੰਦ ਜੀ ਵਿਸ਼ੇਸ਼ ਤੌਰ ਤੇ ਸ਼ਾਮਿਲ ਰਹੇ। ਸਭ ਹਾਜ਼ਰ ਭਗਤਾਂ ਨੇ ਸ਼ਾਂਤੀ ਨਾਲ ਆਪਣੀਆਂ ਸੀਟਾਂ ‘ਤੇ ਬੈਠ ਕੇ ਭਜਨ ਸੁਣੇ ਤੇ ਆਨੰਦ ਮਾਣਿਆ।ਸਜਾਏ ਹੋਏ ਮੰਚ, ਦੀਵੇ, ਗਉ ਮਾਤਾ ਦੇ ਚਿੱਤਰ ਤੇ ਭਜਨਾਂ ਦੀ ਸੁਰੀਲੀ ਧੁਨ ਨਾਲ ਪੂਰਾ ਮਾਹੌਲ ਆਧਿਆਤਮਿਕ ਰੌਸ਼ਨੀ ਨਾਲ ਚਮਕ ਉਠਿਆ। ਭਗਤੀ ਭਜਨ ਗਰੁੱਪ ਦੇ ਮੈਂਬਰਾਂ ਨੇ ਵੀ “ਗਉ ਮਾਤਾ ਦੀ ਜੈ ਹੋ”, “ਗੋਪਾਲ ਕੇ ਭਜਨ ਗਾਓ” ਵਰਗੇ ਸੁਰੀਲੇ ਭਜਨ ਗਾ ਕੇ ਸਮਾਰੋਹ ਨੂੰ ਚਾਰ ਚੰਦ ਲਾ ਦਿੱਤੇ।
ਅੰਤ ਵਿੱਚ ਧਰਮਪਾਲ ਬਾਸਲ ਜੀ ਨੇ ਸਭ ਦਾ ਧੰਨਵਾਦ ਕੀਤਾ ਅਤੇ ਅਪੀਲ ਕੀਤੀ ਕਿ ਹਰ ਵਿਅਕਤੀ ਆਪਣੇ ਜੀਵਨ ਵਿਚ ਗਉਸੇਵਾ ਅਤੇ ਭਗਤੀ ਦਾ ਸੁਤੰਤਰ ਪਾਠ ਕਰੇ, ਤਾਂ ਜੋ ਸਮਾਜ ਵਿਚ ਸ਼ਾਂਤੀ, ਸਹਿਯੋਗ ਤੇ ਆਧਿਆਤਮਿਕਤਾ ਦਾ ਪ੍ਰਸਾਰ ਹੋ ਸਕੇ। ਇਸ ਮੌਕੇ ਭਗਤੀ ਭਜਨ ਗਰੁੱਪ ਦੇ ਮੈਬਰ ਅਸ਼ੋਕ ਗਰਗ, ਕੈਲਾਸ਼ ਸ਼ਰਮਾ, ਮੁਕੇਸ਼ ਗੋਇਲ, ਗੌਰਵ ਅਨਮੋਲ ਅਤੇ ਰਾਕੇਸ਼ ਪਾਠਕ ਆਦਿ ਵੀ ਸ਼ਾਮਿਲ ਹੋਏ।
